阿史之前介紹過响香港淪陷期間，日本軍政府就响香港興建幾間「神社」，其實唔止香港，响抗戰期間中國淪陷區都出現咗唔少神社，甚至連民國首都南京响淪陷後都有「神社」出現。
南京响1937年落陷，成為日軍控制嘅地區。响1941年，日方就响南京五台山興建「南京神社」，呢座「神社」响1943年竣工，作為當地日本人供奉「天照大神」以及陣亡日軍嘅「神社」。當然！响1945年8月，日本戰敗投降後，呢座「神社」就被廢棄。後嚟國民政府就將呢個地方改建為「中国抗戰陣亡將士紀念堂」，内裡原本嘅日軍牌位就被掃出門口，换上抗日犧牲嘅中國官兵靈位。新中國成立後呢個地方就被江蘇省體育局使用，神社附屬建築逐一被拆，依家就只剩返正殿同側殿。所以，史友們今時今日去南京五台山，仲可以見到呢個地方。
原圖嚟自網絡