繼續同史友們介紹我國嘅珍貴文物，大型嘅金銀器、玉器、青銅器就同大家介紹過唔少，細到咁嘅金器唔知史友們又見過未呢？今次就同大家講一講現時收藏喺陝西歷史博物館嘅「赤金走龍」啦！

赤金走龍係喺1970年嘅西安南郊何家村出土，係一組唐代嘅文物。呢組一共有十二隻，佢哋嘅特別之處係在於「細」。事關當中最高嘅都不過係2.8厘米，而最細嘅就只係得2厘米，但每一隻都充分呈現到闊嘴伸頸、頭頂雙角、兩唇張開、體雕滿鱗片嘅工藝，而且各自仲有各種姿態行走狀，真係相當難得！

同一般嘅金銀器唔同，呢組「赤金走龍」其實係反映咗唐代道教外丹術嘅興盛，「赤金走龍」理應係投龍祭祀儀式中所用嘅法器，由於道教有天、地、水三官信仰，並且習慣以「沉埋」方式祭祀，所以喺舉行完醮儀後，所用到嘅金銀器都會投入名山大川之中，作為升度之信，以奏告三元。

原圖嚟自網絡