真係千呼萬喚始出來，大家期待咗好耐嘅三國奸雄曹操墓終於就喺出年五月對公眾開放，到底呢位歷史上影響後世深遠嘅人物，死後嘅墓係點樣呢？大家可能好快就會親眼睇到！
早喺2009年，河南安陽曹操高陵嘅發現就受到考古學界廣泛嘅關注，當地政府甚至仲將呢個遺址打造成三國文化遺址公園，並且會喺出年就全面對外開放。據《三國志》等史料記載，曹操喺公元220年卒於洛陽，靈柩葬於鄴城西門豹祠以西丘陵當中。而喺2008至2009年間，河南嘅文物考古研究所就對「曹操高陵」進行發掘並且清理出兩座墓葬，後來國家文物局都認為呢個墓墓主係曹操。
曹操高陵經過考古發掘同埋復原文物之後，大約就出土250件文物，當中最重要嘅就係有刻銘石牌、刻有「魏武王常所用挌虎大戟」、「魏武王常所用挌虎短矛」等文物，再加上墓葬形制與規模都、墓主骨骼鑒定等元素都印證墓主身份就係曹操。
雖然每樣證據都齊全，但坊間都仲有學者表示刻銘石牌可能只係饋贈品，而墓嘅形制、冥器都同曹操王侯身份唔對等，唔知史友們又點睇呢？
原圖嚟自網絡