最近因假期關係，阿史就去咗南區一趟。近年因為南港島線開通關係，商業活動中心慢慢從香港仔轉移至鴨脷洲大街同黃竹坑，相信隨著黃竹坑站上蓋物業落成，港島南可能會出現兩個商業活動區域。

香港仔呢個地方可以話係歷史悠久，甚至港島北岸未有發展前香港仔一帶已經有相當程度發展。呢個地方既係一個漁港，亦係一個貨物出口港，昔日香港出產嘅香木就從呢度運去廣州。後嚟香港仔兩岸出現造船工業，1857年更有夏圃船塢建成，呢個船塢係香港首個大型船塢，船塢建成之後三年，就俾黃埔收購咗，易名為香港仔船塢。

咁今時今日呢個船塢又响邊呢？答案係搵唔到！因為响上世紀七十年代，航運業出現衰退，黃埔就响香港仔船塢關閉，將原來船塢發展為私人屋苑，亦即係依家香港仔中心喇！

原圖嚟自網絡