當年今日對唔少梅迷嚟講真係相當傷感嘅一日,特別係今年更加感觸。喺2003年12月30,一代巨星梅艷芳因子宮頸癌併發肺衰竭病逝,享年40歲。
而今年亦都係電影《梅艷芳》上映嘅時間,令到唔少梅迷更加諗起呢位「香港的女兒」。梅艷芳出生喺1963年10月10日,早喺4歲之齡就已經同家人去到荔園、啟德遊樂場賣唱,而喺1982年佢參加咗由無綫電視及華星唱片合辦嘅新秀歌唱大賽,憑住一首〈風的季節〉勝出,自此展開佢嘅星途。
喺佢生涯當中,佢以「百變」聞名,曾經連續五屆奪得十大勁歌金曲頒獎典禮「最受歡迎女歌星」,同時亦都憑香港電影《胭脂扣》一舉拿下台灣金馬獎、香港電影金像獎「最佳女主角」殊榮,係香港演藝界第一位取得「歌后」及「影后」級非凡殊榮嘅女藝人。除咗演藝成就,佢一生亦都為善不甘後人,所以亦都被唔少媒體稱為「香港女兒梅艷芳」。
原圖嚟自網絡