河南三門峽出土戰國時期銅編鐘

提起戰國時期嘅銅編鐘，可能唔少史友都會即時諗起舉世知名嘅曾侯乙墓銅編鐘，總數多達54個部件嘅編鐘音階極廣，音律準確，一直都吸引到唔少海外人士嘅熱愛。而近日喺河南三門峽，竟然又有一套戰國時期銅編鐘出土？阿史今次就帶大家睇一睇啦！

據河南三門峽考古研究所指，近日考古人員就喺當地嘅基本建設工程當中，發現到一個早期嘅戰國墓葬群，數量足足達到260座，而當中亦都發現有唔少隨葬品。據史料記載，三門峽一帶喺戰國時期就被魏、秦、韓交替占領，所以呢個地方好可能係魏國早期公共墓地。

目前考古人員已經發掘到近一百座戰國墓葬，都係長方形嘅豎穴土坑墓；而喺當中就有一個規格比較高嘅「五鼎墓」。據了解，呢個墓葬嘅主人係女性，隨葬嘅物品就有唔少銅鼎、銅盤、銅匜、銅舟等；至於另一個發掘緊嘅墓葬，就有大量青銅器，當中由銅鼎、銅鬲、銅戈、銅戟以至銅編鐘都應有盡有，真係犀利！