之前阿史介紹過「無間道」同「無間地獄」，今次又想介紹另一個响現代文學小說中出現嘅佛教概念「天龍八部」。

每當提起天龍八部，相信史友們第一時間會諗起段譽喬峰虛竹佢哋，即係會諗起金庸武俠小說《天龍八部》。不過睇過呢部作品嘅史友，都應該會知道金庸查大俠响書嘅開頭「釋名」就對天龍八部呢四個字有解釋。

簡單而言，天龍八部係指以天眾、龍眾為首嘅八部佛教護法神眾（可理解為神話種族），包括天、龍、夜叉、乾闥婆、阿修羅、迦樓羅、緊那羅、摩睺羅伽，又稱八部眾。但由於天眾同龍眾最為重要，因此稱為天龍八部。據《法華經：提婆達多品》對天龍八部就有以下描述：「天龍八部、人與非人，皆遙見彼龍女成佛。」

至於八部眾各有特色，天眾係受善報而生於天界嘅眾生；龍眾係形狀似蛇、能呼風喚雨嘅眾生，有福報但由於瞋或癡而墮龍身；夜叉義譯疾行鬼，以威勢惱害人類或守護正法嘅鬼類；乾闥婆義譯香神，係音樂神；阿修羅係喜愛戰鬥嘅眾生，有福報但因瞋、慢、疑而生為阿修羅；迦樓羅義譯金翅鳥，以吃龍維生；緊那羅義譯歌神，係頭上長角嘅人形天眾；摩睺羅伽義譯大蟒神，蛇頭人身。响八部眾當中，守護佛法嘅則為護法神，否則就係惡鬼神。

講返轉頭，金庸《天龍八部》其實只係借咗「天龍八部」呢四個字嚟創作，裡面就無乜涉及佛教中天龍八部嘅概念，反而日本動漫作品《天空戰記》就以八部眾作為八位天空界提婆神軍嘅身份。