近年嚟「沉睡三千年」嘅三星堆遺址接連有好多新嘅考古成果出爐，就好似金面具、青銅神壇等等嘅國寶級文物陸續出土，唔單引起國人對呢個遺址嘅關注，更加牽起一股文博熱。唔少內地網民都深入研究各類嘅考古文物，近排討論得最多嘅一件就係三星堆以往發現嘅青銅神樹！

三星堆遺址位於中國四川省廣漢市城西，係一個青銅時代嘅文化遺址，因為古域內有三個起伏相連嘅黃土堆，所以就被稱為「三星堆」。呢個遺址嘅年代據估計係由公元前2800年至公元前1100年，歷史相當悠久。呢個遺址嘅發現亦都印證長江流域喺上古時期同黃河流域一樣擁有高度文明。

而要證明呢一點，其中一樣重要嘅就係呢度出土嘅文物。目前，三星堆遺址一共發掘出6棵青銅神樹，最完整嘅正係1986年在二號祭祀坑出土「一號神樹」。

「一號神樹」高3.96米，係中國現存最大單件青銅文物，但出土之時就碎成2479塊碎片，根本唔知原型會係點。但經過專家10年努力，青銅神樹最終被還原，並且煥然一新！

原圖嚟自網絡