之前阿史介紹過「無間道」、「天龍八部」同佛教嘅關連後，今次阿史就想介紹一個史友們應該會聽過嘅佛教概念，就係六道輪迴。响《聖鬥士星矢》中，處女座沙加其中一招絕技就係「六道輪迴」，就係將對手靈魂打入六界其中一界。動漫還動漫，咁六道輪迴又係點樣嘅概念呢？
响佛教嘅概念中，六道即係天道、人道、修羅道、畜生道、餓鬼道同地獄道，又稱六趣，而六道輪迴就係眾生响六道上下浮沉生死流轉。輪迴去邊一道，都會因五戒十善及十惡五逆而有所類別，五戒十善分為上中下三品，感生天、人、修羅三道；十惡五逆分為下中上三品，感生畜生、餓鬼、地獄的三道。作善業，生於上三道；作惡業，生於下三道。
眾生生死輪迴雖有六道，但眾生善惡業因嘅造作就以人道為主，亦只有人道係造業並兼受報嘅雙重道，其餘各道都只係受報嘅單重道，好似天道只有享受福報，下三道只有感受苦報。只有人道既能受苦受樂，又能分別善惡。
原圖嚟自網絡