喺提到將舊有嘅賬目抹去、將原先嘅一切取消從頭再來，我哋好多時候都會用到「一筆勾銷」呢個詞，但唔講唔知，其實呢個舉動喺最初其實係同「炒魷魚」有關？阿史今次就同大家講一講啦！
相信唔少史友都知道，喺北宋時期，著名嘅文學家范仲淹同時亦都係一位宰相，負責處理國家大事，佢行事敢作敢為，亦都有返一定嘅政績。而其中一樣佢做得比較出色嘅事，就係對下屬各級官僚嘅管理。范仲淹相當注重佢哋嘅品德同埋才能，每當佢發現有人唔稱職，佢就會將呢啲官員嘅名由花名冊上一筆劃去，換上新嘅官員。
曾經就有人勸佢筆下留情，話咁樣做會令被免職嘅官員好傷心，但佢聽完之後就馬上反駁，假如自己唔罷免呢啲官員，傷心嘅就會係一座城市嘅百姓，呢個就係「一筆勾銷」嘅故事喇！
原圖嚟自網絡