尋日就同史友們介紹咗「秦准八艷」嘅來歷，而提到古代嘅美人，相信唔少史友第一時間都會諗起「四大美人」，但唔講唔知，其實「四大美人」各自都可能有一啲不為人知嘅生理缺憾，阿史今次就同大家講一講啦！
中國古代四大美人西施、王昭君、貂蟬、楊玉環相信史友們都必定聽講，亦都知道佢哋嘅美貌係被稱為沉魚落雁閉月羞花，令所有男人為之而癲狂，但其實佢哋各自嘅身上都有一啲小缺憾。
就好似西施咁，佢原名施夷光，出生喺春秋末期一個農夫家庭。據講佢喺河邊浣紗，河水反映到佢嘅倩影，都會令到河入面嘅魚唔記得咗自己游緊水，甚至沉咗入水中。而其實西施本身隻腳係生來有疾，為咗掩飾呢一點，佢仲刻意特製咗一對木屐。
「昭君出塞」嘅王昭君喺漢家歷史上有住相當重要嘅地位，憑住佢出塞當時馬上彈奏一首《琵琶怨》，令到南飛嘅大雁都唔記得拍翼，落入咗沙地之上。而其實王昭君天生係生咗一副斜肩，肩膀窄小令到佢都要喺入面放上墊肩。
至於貂蟬就係三國時期嘅美人，呂布為咗佢甚至殺死董卓，據講佢嘅美貌可以令到天上嘅烏雲將月亮遮住。而其實，貂蟬嘅耳仔生得極細，甚至令到五官嘅比例相當奇怪。
而去最後嘅楊玉環據講喺賞花之時因為唔小心掂到含羞草而令到草捲咗起嚟，成個舉行就好似令到花花草草自愧不如。而關於楊貴妃缺點其實就係體味好重，亦即係狐臭，所以佢經常都會隨身佩戴香囊。
原圖嚟自網絡