繼續同史友們介紹我國嘅考古發掘以及研究工作，近排山西省考古研究所就表示，經過長時間嘅發掘工作，終於成功令到果個曾經被土、石頭掩埋嘅霍州市千佛崖摩崖造像重新完整面世。
霍州市千佛崖摩崖造像位於山西臨汾嘅一個東岸山岸上，長約30米，佛像分佈喺距離地面接近11米0崖壁，密集嘅區域仲多達8層，認真誇張！面對呢個咁巨型嘅遺址，考古團隊早喺2021年就聯同北京大學、霍州市文化以及旅遊局聯合發掘。據目前統計，呢個遺址一共有70餘龕，約300尊造像，目前就成功令其中約三分之一重新面世。
咁具體呢度又有咩睇呢？千佛崖摩崖造像題材多數係常見嘅一佛二菩薩或一佛二菩薩二弟子；而當中嘅佛像臉型多為方圓，身形圓潤健壯，多着通肩袈裟；菩薩造像多束高髻，體態豐盈，衣着華麗都係當中嘅特點。
始鑿於唐代高武時期霍州千佛崖摩崖造像，係山西重要唐代中型造像群，對研究盛唐向中後期過渡嘅造像風格、類型演變等提供重要材料，阿史真係期待有再進一步嘅考古發現啊！
原圖嚟自網絡