如果史友們有去過上海，唔知有冇去過世界知名、國內頂尖嘅復旦大學參觀呢？阿史好多年前就曾經去過，而呢間大學創辦嘅歷史亦都相當令人動容，今次就同大家講一講啦！

提到復旦大學，當中最關鍵嘅一個人物就係華封老人馬相伯。馬相伯出生喺1840年嘅江蘇天主教村馬家村嘅一個世代都信奉天主教嘅家庭。喺1851年，佢就秘密離家去到上海聖依納爵公學就讀，後來更加以22歲之齡成為為首批11名見習修士之一。喺佢見習期間，佢就被派往蘇州、太倉救護難民，後來就升入大修院，研習神學、哲學、數學等，成功晉升神父。雖然係做咗神父，但後來馬相伯喺捐款救濟災民、協助學生考取秀才、翻譯《數理大全》等事上同教會有唔少衝突，最終決定退出耶穌會還俗。

喺1876年，36歲嘅馬相伯喺長兄馬建勛推薦下，就先係成為山東藩司余紫垣幕僚，投身洋務運動，更出任過駐日使館、朝鮮參贊。去到1893年，馬相伯重返教會並且熱心教育事業，先係捐出自己名下松江等地3000畝田地用作興辦大學，當時佢就喺上海徐家匯老天文台創辦震旦學院，係中國第一間私立大學，並且容許學生自治校政。但後來耶穌會取消呢個政策引發學生集體退學，馬相伯亦再次出手另創復旦公學，意指「復我震旦」，而佢亦都成為首任校長。

馬相伯絕對係一個讀書人，喺1917年佢就退出公職，離開北京，退隱上海土山灣徐家匯孤兒院翻譯天主教書籍，但去到九一八事變之後，年逾九十嘅馬相伯仍然投身救亡運動，發表文章與演講，勉勵同胞共赴國難，難怪喺當時會被稱為「愛國老人」，亦都充分展示咩叫「讀書不忘救國」。

原圖嚟自網絡