繼續同史友們介紹世界各地嘅考古發現，隨住城市發展同埋科技嘅發達，近年唔少國家都可以進行好多高難度嘅考古發掘，而近排英國有一樣發現被稱為「英國考古史之最」，阿史今次就帶大家一齊睇睇啦！

近排喺英格蘭拉特蘭湖（Rutland Water）水庫就完成咗一場盛大嘅發掘工程，當中就出土咗一具被稱為「海龍」、有成十公尺長、距今1.8億年歷史嘅史前魚龍（ichthyosaur）化石出土。據報導早喺舊年二月就已經有人發現到呢具魚龍化石，但要安全咁完成到成個發掘工程就真係需要唔少時候。其實早喺19世紀初期，英國本土就有唔少零碎嘅魚龍化石被發現，但講到咁大同埋咁完整嘅，就真係少之又少！

據曾經研究當地侏儸紀化石長達20年嘅專家表示，呢次發現嘅化石早喺裸露出部位嘅時候，就已經知道佢將會係英國本土史上最大。魚龍呢種生物係水生爬蟲類動物，最早就喺2.5億年前出現，大約在9千萬年前滅絕，所以要完整發掘到，真係唔係容易嘅事！

原圖嚟自網絡