唐朝可以講係詩歌發展最豐盛嘅年代,當時出咗唔少出色嘅詩人好似李白、白居易、杜甫等等,佢哋各自都有唔少傳頌後世嘅出色詩作,但喺芸芸嘅詩作當中,竟然有一位詩人一生只係寫過兩首詩,而其中一首更被譽為係「孤篇壓全唐」,阿史今次就帶大家睇一睇啦!
要介紹呢首傲視千古嘅詩作《春江花月夜》,當然就要介紹下位作者先啦!呢首詩作嘅作者係張若虛,喺歷史上嘅生平記載少之又少,佢一生所作嘅詩只有兩首,一首係冇乜人識嘅《代答閨夢還》,而第二首就係傳頌千古嘅《春江花月夜》。《春江花月夜》由主題嚟講就係一首描寫離情別意嘅離別詩,抒發嘅係春日美景下遊子思婦嘅哀哀怨怨。就咁喺主題上睇嚟似乎冇太大嘅特色,但詩中就以大量意象堆砌,將春、江、花、月、夜連成一線,由寫花、寫月、寫水嘅句子基上可以見到辭藻嘅華麗,但更深嘅其實就係「心中圓月」嘅哲理,唔知史友們又點睇呢?

原圖嚟自網絡