貝聿銘呢位傳奇嘅華人建築師阿史就同大家講過佢唔少事蹟，亦都提過佢為咗保留北京城嘅風貌曾經拒絕過喺長安街興建高樓，咁到底貝聿銘喺北京又有冇建築作品呢？其實係有嘅，事關佢第一座喺中國內地嘅建築作品就係北京香山飯店。

上回就同史友們講到，喺改革開放前，貝聿銘曾經三度嚟到中國，而當時政府部門就有官員建議佢喺中國留啲紀念，想佢喺長安街興建高樓，但喺貝聿銘拒絕之下，取而代之就係喺北京郊區興建一座酒店，呢座就係香山飯店。香山飯店主體就係一座白色嘅現代主義樓房，採用蘇州園林風格設計，飯店最寬鬆嘅常春廳大堂，就係採用玻璃屋頂自然採光，令到內庭成為光庭，就連窗戶細節都有花瓶、竹嘅形狀，極具貝氏建築設計特色。

唔單止咁，主體建築後面更加係典型中國式園林，由水池、鵝卵石小徑、假山等組成，睇落就好似一幅古畫咁。對於呢個咁具匠心嘅設計，其實當年出到嚟曾經被批評太過簡單，唔知史友們又點樣睇呢？

原圖嚟自網絡