繼續同史友們介紹一啲細個經常讀到佢詩詞，但史實嘅形象反而完全唔一樣嘅歷史人物，繼李紳、匡衡之後，阿史今次就要講一講「情聖」元稹。
提起呢位著名嘅唐朝詩人，相信唔少史友都必定讀過佢嘅《離思》「曾經滄海難爲水，除卻巫山不是雲」，亦都係因為呢首被稱為「千古第一情詩」嘅詩作，令到佢被尊稱為情聖，之但係史實到底又係咪咁呢？
元稹同白居易共同倡導新樂府運動，所以被世人稱為「元白」，而元稹早喺十五歲就已經參加朝廷明經考試，二十四歲更加參加貢舉科考，登書判拔萃科。當時仲係二十幾歲嘅元稹就已經同遠房表妹崔鶯鶯一齊，並且仲拋棄咗人哋。而為咗可以進京求官，佢又搵到新任京兆尹韋夏卿，並且娶咗佢個女韋叢為妻。婚後七年，韋叢一共爲元稹育有五子一女，但就因為一場大病而失去生命。當時元稹升任爲監察御史，亦都係呢個時候寫咗《離思》等十六首詩，令到全國一片譁然，人人都讚佢係大情聖。
之不過，呢位情聖之後就同大唐四大才女薛濤、劉採春有過關係，並且都係由佢拋棄對方，到底佢係情聖定係「渣男」？唔知史友們又點睇呢？
原圖嚟自網絡