喺1919年1月18日,對未來嘅世界和平嚟講係相當重要嘅一日,事關第一次世界大戰嘅戰勝國就係喺當年今日喺凡爾賽宮開巴黎和會,對未來甚至係第二次世界大戰影響深遠。

喺1918年11月,第一次世界大戰以協約國勝利而宣告結束,而為咗解決戰爭造成嘅問題以及戰後嘅和平,當時戰勝國就召開咗巴黎和會。之不過雖然叫就叫做和會,但當時並冇邀請戰敗國以及中立國參加,甚至戰勝國之間都有大小之別,可以話係一場由大國操縱嘅和會。

喺呢場和會之上,戰勝國就決定咗處置德國嘅凡爾賽和約、確立戰後世界由美國、英國、法國等主要戰勝國主導、籌組國際聯盟等等嘅手段希望可以維持世界和平。之不過喺遏制德國等戰敗國嘅問題上,以及中國山東問題處理不公,都令到後來軸心國嘅極端民族主義崛起。甚至仲有史學家形容,呢場並唔係一場和會,而係休戰嘅會議,唔知史友們又點睇呢?

原圖嚟自網絡