如果就咁睇呢兩張圖片,史友們可能以為係外星文明留下嘅痕跡,但如果阿史同大家講,呢啲「神秘圖案」係人為造成,而且仲有成4,500年歷史,唔知史友們又信唔信呢?
近排考古學家就喺沙特阿拉伯北部搵到呢一批神秘圖案,而當地居民就稱之為「古墓大道」。據了解,原來生活喺呢區嘅居民歷代都對「古墓大道」有所了解,但假如唔係通過考古團隊進行嘅空中測量、地面測量挖掘以及對衞星圖像,都唔會發現到呢啲大道原來係綿延數百甚至數千公里。經過考古團隊研究發現,「古墓大道」當中就有成1.8萬個墓穴並且已經存在咗4,500年歷史,仍然可以保留住基本面目,真係令人難以置信。
為咗可以了解呢啲古墓本身,考古團隊就將其中80個發掘並且進行採樣,之不過當中仲有個謎題未解。就係呢啲「古墓大道」出現之前,其實墓葬同埋路綫就已經存在,點解仲要去興建「古墓大道」?到底係咪出於紀念性質?咁就要更多嘅發掘先有可能解答到喇!
原圖嚟自網絡