同史友們介紹一啲細個經常讀到佢詩詞但真實形象有啲出入嘅歷史人物,今次就想介紹下一位女詩人,呢位女詩人都可以話相當特別。

「易求無價寶,難得有情郎。」呢兩句詩句相信史友們都聽過讀過,而創作者就係晚唐詩人魚玄機。魚玄機原名幼薇,關於呢位唐代女詩人嘅記載唔算太多,據《全唐詩》小傳錄生平為:「有才思。補闕李億納為妻。」李億係當時狀元及第,亦係一名才子,同魚玄機情投意合,最終被李億納為妻。但後嚟李億夫人裴氏因對魚玄機妒忌,於是李億就將魚玄機遣至咸宜觀入道,成為道士。本來魚玄機做道士之後仍對李億一往情深,仲寫咗《情書寄李子安》、《隔漢江寄子安》、《江陵愁望有寄》、《寄子安》等,憑詩寄情,點知等咗三年先知道李億帶住夫人離開長安去咗揚州做官,魚玄機就寫下一首名為〈贈鄰女〉嘅詩:「羞日遮羅袖,愁春懶起妝,易求無價寶,難得有情郎。枕上潸垂淚,花間暗斷腸,自能窺宋玉,何必恨王昌。」魚玄機就以呢首詩表露自己絕望一面。

自此之後,魚玄機响道觀裡面經常同長安城中名士往來酬唱,成為京城知名嘅豪放才女。不過魚玄機就因殺咗侍女綠翹,被京兆尹溫璋處死。據晚唐皇甫枚所著嘅小說《三水小牘》記載,話魚玄機懷疑綠翹同道觀來客有染,心生妒意而殺人。

原圖:元機詩意圖