早兩日阿史就同史友們介紹咗貝聿銘所設計嘅北京香山飯店以及銅鑼灣新寧大廈，呢兩座建築為興建之後都成為一時熱話。之不過，其實貝聿銘喺香港設計嘅一座建築物，喺興建之時就因為外形而被批評危害香港風水，咁到底點解呢？阿史今次就同大家講一講啦！
其實早喺80年代，貝聿銘受到中國銀行委託，喺香港設計同興建一座可以將滙豐銀行大樓比下去嘅新中銀大廈，但就只有10億港元嘅預算。對比起當年滙豐銀行大樓78億嘅造價，10億係差距好遠啦！為咗可以解決預算問題，貝聿銘除咗提出向政府換地，將原址嘅斜坡窄地換成平行四邊形嘅現址之外，佢更加採用咗一種嶄新建築結構，就係以四組三稜柱作主要承重點從而減低鋼材使用，節省成本，加上咁樣仲可以令到大樓外觀更加眼前一亮。
之不過，由於呢種破局嘅設計係將中銀大樓設計到好似尖刀刺天咁、內部更加係呈一個「X」型，所以當年就引起唔少風水爭議，甚至1987年股災都扯埋落呢件事度。為咗解決呢個爭議，令到大樓可以喺1990年順利開幕，貝聿銘就將「X」橫向結構桁架隱藏，並且將「尖刀刺天」講成係節節上昇嘅竹，咁樣先至巧妙化解到質疑，唔知史友們又點睇呢？
原圖嚟自網絡