金國被滅後女真族下場如何？

記得响上個月講過金國被蒙古同南宋聯合消滅咗，政權就滅亡咗，咁金國嘅女真人下場係點呢？

响蒙古興起時，蒙古大部分部族都係臣服於金國之下。而响金國眼中，蒙古族只係北方未開化嘅遊牧民族，亦曾經對蒙古施行分化同高壓政策。一度為蒙古首領、成吉思汗嘅祖輩親戚俺巴孩就被金熙宗用刑，被釘在木驢上處死，聲稱為「專懲治遊牧叛人」嘅刑罰。

金國政權諗住蒙古各族打生打死就唔會威脅到佢哋，點知鐵木真統一蒙古各部族，之後仲建立一個強大帝國，金國最後被蒙古大軍打到殘，最終被蒙宋聯軍所滅。而响蒙古進侵金國時，响佔領區基本上都係採取「三光」政策，即殺光、搶光、燒光，所以唔少女真人都死响戰亂當中。而响金國滅亡後，蒙古政權就宣布大赦天下，但就係有一族就無咁好彩，呢個就係姓完顏嘅人。呢道「唯完顏氏不可赦」嘅命令，就令完顏族女真人都改單字漢姓，並融入漢人生活。由於多年嚟嘅漢化，所以响中原生活嘅女真人已經同中原漢人無異。