喺晚清嘅歷史當中,提到八國聯軍好多時候大家都會諗起「扶清滅洋」嘅義和團,義和團呢股民間勢力甚至仲有段時間同西方列強進行過抗爭。不過唔講大家都未必知,其實義和團唔單止得男人,其實仲有一支「娘子軍」,今次阿史就同大家介紹下紅燈照嘅首領!
要知道義和團創始人名為朱紅燈,自稱係明朝皇族後裔嘅佢係喺1898年因逃避水災而到長清縣大李莊,喺當地設立場地練拳並且提出「興清滅洋」、「拿洋教、保江山」等口號而聞名。義和團運動好快興起,而當時朱紅燈就提出女性都要學義和拳,提倡婦女成立「紅燈照」。
而當津門嘅紅燈照成立之後,當地嘅大師姐林黑兒就被稱為「黃蓮聖母」,佢傳說功夫出神入化,凡係加入嘅婦女只要跟佢學幾日,都可以得道術成,佢哋手持紅摺扇徐徐扇動就可以升高登天,右手紅燈投擲出去,就會變成一片火海,真係誇張!
全盛時期嘅紅燈照一度去到三千幾人,而當八國聯軍攻入天津之後,林黑兒好快就被捕,佢後來下落不明,有傳被姦殺、流亡、甚至被八國聯軍製成標本,總之呢個係一個謎啦!
原圖嚟自網絡