繼續同史友們介紹一下我國嘅一啲傳奇寶物，「翠玉白菜」呢件珍品相信唔少史友都曾經親眼見過，而拍得住呢件寶物嘅其實仲有一件慈禧最受嘅一件珍藏「翡翠西瓜」，今次阿史就同大家講一講啦！
「翡翠西瓜」顧名思義就係以打造成西瓜造型，而「翡翠西瓜」其實一共有兩隻，慈禧太后相當珍重呢兩件寶物，唔單住搵啲造工精緻嘅盒裝住，甚至仲派專人日復日看守，以防有咩閃失。而之所以慈禧太后咁沉迷呢對寶物，全因為佢深信「翡翠西瓜」有美顏功效。
而喺1908年光緒帝以及慈禧太后死後，呢對西瓜其實係隨住慈禧太后去陪葬，放正喺佢棺槨兩隻腳下面，寓意飛仙吉祥。而據李蓮英《愛月軒筆記》特別記載，兩隻翡翠西瓜每隻估價最少220萬兩白銀，而當時全個大清一年最多不過8000萬兩白銀，真係不得了！
咁講咁耐，呢對西瓜最後到底去咗邊度呢？原來喺1928年東陵大盜孫殿英率軍盜墓之後，呢兩隻「翡翠西瓜」，據講其中一隻就送咗畀行政院長宋子文，後來轉輾落入美國人手中，而另一隻就被銷贓去咗外國，不知所蹤，所以「翡翠西瓜」到底有幾靚就真係冇人知喇！
原圖嚟自網絡