以往阿史都同史友們介紹過唔少中國之父,就好似有原子彈之父錢三強、雜交水稻之父袁隆平、導彈之父錢學森等等,而今時今日我哋資訊之所以可以咁流通發達,絕對同以下落嚟阿史要介紹嘅呢位中國之父有關,佢就係中國衛星之父孫家棟。

孫家棟出生喺1929年,佢當時係以13歲之齡考入哈爾濱第一高等學校土木系,但點知冇幾耐就因為戰爭而失學,去到1947年就考入哈爾濱工業大學預科班專修俄文,後來就一度加入咗中國人民解放軍空軍。而佢嘅經歷當然唔止咁簡單,佢因為成績優點,喺1951年就去到蘇聯茹科夫斯基空軍工程學院學習,並且喺1958回國之後就被錢學森睇中,就去到錢學森主持嘅國防部第五研究院從事飛彈研究。

雖然孫家棟多年嚟都係學習航空理論,但當時受到錢學森信任之下,佢就積極研究導彈、衛星設計研製工作。喺佢以及其他科學家努力之下,最終「東方紅一號」、「實踐一號」衛星、「東方紅二號」等標誌性嘅衛星都可以順利發射成功,佢甚至仲係北斗導航系統第一代、第二代總設計師。

睇返孫家棟成世嘅經歷,可以話係7年學飛機,9年造導彈,50年放衛星,總之國家需要啲咩,佢就去做啲咩啦!

原圖嚟自網絡