喺尋晚大台嘅節目入面，平日熱愛書法嘅阿姐汪明荃就即席揮毫寫咗「福」、「虎」、「吉祥」等字應節，其中阿姐就用草書寫咗個「虎」字，隨即就引起唔少網民熱議，直言呢個字嘅外觀同某個粗口字有九成相似。到底事實又係點呢？阿史今次就同大家講一講啦！

其實冇練開書法嘅網民就真係有所不知，「虎」呢個字喺書法入面其實有好多唔同寫法，喺歷史上最初嘅時期，「虎」字象虎形，所以喺甲骨文上就有上部虎頭、下部虎尾；而去到戰國時期，文字就開始進行簡化，所以虎身、虎足、虎爪呢啲部分就簡化成「儿」。

而根據呢啲演變，「虎」就有過好多寫法，就好似將虎字頭「虍」變換、將下面「儿」寫成「巾」、又或者「虍」同埋「儿」都一齊變換等等，至於阿姐今次寫嘅就係草書當中嘅「虎字」，會將「虍」及「儿」作筆順及筆劃簡化，所以其實呢個真係一個「虎」字嚟架！

原圖嚟自網絡