近日《長津湖》續集《長津湖之水門橋》就作為2022年賀歲檔電影喺大年初一上映，《長津湖》過往就創咗唔少紀錄，而作為續集嘅《水門橋》就喺開畫25小時票房已突破20億人民幣，真係相當誇張！同樣都係以抗美援朝嘅戰役作為背景，咁到底《水門橋》嘅歷史背景又係點樣呢？阿史今次就同大家講一講啦！

要知道水門橋其實係長津湖地區通往海邊嘅唯一公路之上最關鍵嘅橋樑，呢條跨度只有8.8米嘅橋樑係美軍陸戰1師突圍逃走嘅唯一希望，所以呢個地方係極具戰略意義。於是，喺當年12月1日，志願軍就以大量炸藥炸毀水門橋，但點知好快就被英軍陸戰隊工兵以一座木橋修復後成功通車；而志願軍第二次炸橋就係喺12月4日，成功炸毀之後美國工兵就以原橋殘留橋根部架設咗鋼木橋樑，並且令到水門橋恢復通行；而第三次就係12月6日，志願軍小分隊空頭就將新建嘅橋以及原橋全部炸毀，美軍當時驚魂未定。

眼見情況不妙，當時美軍工兵參謀兼第1工兵營營長帕特里奇中校就直頭要求美軍總部來空投橋樑，結果喺日本三菱重工連夜製作8套M--2型鋼木標準橋樑，再由C-119運輸機運到一千幾公里以外嘅朝鮮水門橋組裝，美軍就成功喺12月8日架起咗一條可以畀重坦裝備通過嘅橋樑，結果就令到原本應該被全滅嘅美軍陸戰1師一千輛車輛、坦克及大炮成功逃走。

而事後其實美軍陸戰1師亦都表示，如果當時中國有更好嘅後勤保障，陸戰1師就必定全滅，所以史友們睇電影之餘，都可以感受下當時革命先輩用鮮血同埋生命換來嘅戰果。

原圖嚟自網絡