今日係年初三，即係赤口，唔少香港人都鍾意响呢日去車公廟拜神，史友們只要曾經年初三去過沙田車公廟，都應該見識過點樣人山人海。其實，除咗沙田，香港仲有兩個地方可以拜車公。
香港最早出現嘅車公廟，係响橫洲東頭圍嘅二聖宮。呢座廟宇嘅建成年份不可考，但據廟內文物康熙戊戌年鑄造古鐘推斷，至少就係1718年建成，亦都有學者估計廟宇有600年歷史。而第二座供奉車公嘅廟宇就响西貢蠔涌，相傳响明代蠔涌發生疫症，當時蠔涌嘅鄉紳就諗起車公，於是就向橫洲鄉民借咗車公建廟。到咗清代，沙田一帶發生疫症，瀝源嘅父老就想向蠔涌借車公建廟，但蠔涌父老就只係肯畀佢哋請走車公個孫嘅神主牌，就係咁車公三世就坐鎮响沙田。
咁點解最遲建廟嘅沙田車公廟，會最多善信參拜呢？據業界人士講，其中一個原因係沙田車公廟响重建後廟宇範圍大咗好多，一眾善男信女覺得嚟拜祭更為方便都舒服，就係咁喇。咁都得？真係信不信由你。
原圖：wenweipo