1972年2月21日,即係50年前嘅今日,無論對中國定係美國都係相當重要嘅一日,事關呢一日正正就係美國前總統尼克遜訪華50周年嘅日子。
喺1972年2月21日,當時美國總統尼克遜應時任中國國務院總理周恩來邀請,喺國家安全顧問基辛格陪同下,展開為期一星期嘅訪華之旅,並且同當時中國領導人毛澤東、周恩來展開會談。呢個決定亦都令佢成為首位美國在任總統訪問中華人民共和國。
呢一次訪華亦都被形容為「改變世界歷史嘅一個星期」,事關自1949年以嚟,其實兩個都喺冷戰之下展開咗長達25年嘅緊張關係,而喺仍然處於冷戰嘅形勢之下,當時尼克遜就展開訪華呢個決定,希望可以改變當時嘅國際形勢。喺會談同埋訪華之旅結束後,兩國就發表咗《上海公報》,中美兩國之間可以重新對話,求同存異。
而喺半個世紀之後回望,有唔少學者都認為尼克遜當時係認識到美國此前20年盲信武力同埋意識形態導致嘅問題,而佢唔癡迷於意識形態對抗正正就係佢為現今世界留低嘅重要遺產,唔知史友們又點睇呢?
原圖嚟自網絡