早幾年有睇開《延禧攻略》嘅史友，相信對乾隆、純惠皇貴妃、烏拉那拉氏呢個幾名都係相當熟悉，甚至仲有唔少人都係因為呢套戲而去故宮遊覽。之不過關於呢幾個歷史人物，曾經有出現過一個懷疑嘅「醜聞」，阿史今次就同大家講一講啦！
喺歷史上嚟講，其實乾隆算得上係一位有為嘅皇帝，而作為一位盛世當中嘅帝王，喺死後都自然會風光大葬、皇后都係一樣。之不過當考古學家喺清東陵裕陵遺址進行保護挖掘果陣，就無意之中發現到呢三位歷史人物嘅秘密。喺裕陵遺址當中，裕陵妃園寢就安葬咗36位嬪妃，而純惠皇貴妃作為乾隆後妃就係安葬喺乾隆身邊。
之不過，當專家入到純惠皇貴妃陵墓地宮，就發現地宮之內竟然有兩副棺槨，咁一副當然就係純惠皇貴妃，而另一副到底係邊個呢？呢度就唔賣關子喇，呢位人物其實就係乾隆第二位皇后烏拉那拉氏。
同影視作品當中唔一樣，烏拉那拉氏曾經係乾隆側福晉，乾隆繼位後被冊封為嫻妃，並且喺乾隆15年到乾隆30年高居皇后之位，但點知喺乾隆第四次下江南果陣，佢就因為想阻止乾隆帶一個江南妓女返回官中而不惜剪斷頭髮，而呢個舉動亦都只有皇帝駕崩果陣先會做。於是，烏拉那拉氏就直接被打入冷宮，後來更加鬱鬱而終，最後堂堂大清皇后嘅遺骸就被放咗入純惠皇貴妃地宮之中喇！
原圖嚟自《延禧攻略》劇照