繼續同史友們介紹我國最近嘅重大考古發現，其實早喺2011年，上海市嘅文物局就展開咗一次水下文化遺產嘅普查工作，結果就喺2015年果陣喺江口祟明橫沙水域發現到一艘保存較完整嘅鐵質沉船「長江口一號」，隨住搜尋範圍擴大，喺沉船附近又搵到另一艘體量較大、保存更加完整嘅木船，就係今次阿史要介紹嘅長江口二號喇！

經過六年幾嘅水下考古調查之後，考古團隊就基本探明咗長江口二號古船嘅情況，並且決定展開整體打撈工作。據考古團隊介紹，呢艘古船確認係清代同治年間嘅木質帆船，所處嘅水域就係水深8－10米，船體就位於5米深嘅淤泥當中。成艘古船長達38.5米、寬約7.8米，船身內就有31個艙室，估計就係明清年間經常用作海上運輸嘅平底沙船。

嚟到史友們都最關心嘅一個問題，就係到底船身內有冇咩文物呢？據考古團隊目前探明嘅四個艙室，就發現原來入面都整齊地擺放咗景德鎮嘅瓷器，估計會係繼南海一號之後，中國水下考古又一重大里程碑，甚至仲可以打破世界紀錄，阿史真係相當期待！

原圖嚟自網絡