尋日就同史友們介紹過周恩來以及鄧小平喺法國留學期間就曾經開過一間豆腐店,唔少史友都對呢啲歷史趣聞好有興趣,咁阿史就同大家介紹下尼克遜畀周恩來嘅一幅「藏寶圖」啦!

相信唔少史友都知道,1972年美國總統尼克遜訪華係令到中美關係正常化嘅關鍵,咁尼克遜一心求和自然就唔會兩手空空嚟到中國,佢先係準備咗一件刻花水晶玻璃花瓶、一件高腳酒杯、一個瓷雕天鵝送畀毛澤東,當時嚟講都係相當珍貴嘅禮物;至於準備畀周恩來嘅禮物,除咗有美國喺月球帶返嚟嘅土釀之外,仲有一幅「藏寶圖」。

呢幅「藏寶圖」其實就真係可圈可點,事關佢其實係二戰時期美國嘅一份絕密檔密,係一艘日本貨輪「阿波丸號」當時被美軍潛艇喺中國海域被擊沉嘅位置以及船上嘅物資清單。阿波丸號喺二戰時期係一艘亞洲最大、最先進嘅萬噸貨輪。阿波丸號船身上係有一個紅十字標誌以防被攻擊,以向俘虜運送物資為名,實際就係偷運武器戰略物資。

以呢種手段偷運武器,最終「阿波丸號」就被美國潛艇擊沉,而當時呢艘船上據講係裝住喺東南亞多年來掠奪40噸黃金、12噸白金、15萬卡鑽石、40箱珠寶文物、3000噸錫錠等等以及北京猿人頭骨化石,完全就係一幅寶船。之不過喺打撈工作進行之後,傳說中嘅寶藏並未被發現,大概就只係打撈出價值5000萬美金嘅錫錠。

原圖嚟自網絡