崇禎皇帝被逼自殺 吳三桂左良玉見死不救?

繼續同史友們研究一啲歷史上嘅謎題，喺西元1644年李自成就帶領自己嘅軍隊打入北京城，而當時崇禎皇帝被逼自殺殉國，臨死前仲留低「諸臣誤朕」嘅遺言。睇到呢度，如果以為明朝當時完全冇反撃之力咁就大錯特錯喇，其實當時吳三桂左良玉手上加埋有過百萬嘅軍隊本可以前往救駕，但到底點解呢兩人又會見死不救呢？阿史今次就同大家講一講啦！

先講吳三桂，其實佢手下嘅關寧鐵騎戰鬥力係相當得人驚，要去救駕亦都唔係冇可能，之不過本來奉旨入衛首都北京嘅吳三桂就選擇「遷延不急行，簡閱步騎」，而當崇禎自縊景山，佢就選擇引兵退保山海關，完全就冇救駕嘅意思。

至於左良玉手上其實係有八十萬大軍，大多數都係被捉嚟嘅壯丁農民軍，談唔上係一支嚴格嘅軍隊，但隨住佢逐漸擴大自己實力亦都開始逐漸驕橫，亦都唔聽從調遣。左良玉深知自己嘅軍隊就係地盤、爵位、糧餉嘅本錢，所以絕對唔會輕易去救駕，而崇禎皇帝死後，佢又可以自己建立政權，所以吳三桂左良玉真係見死不救！