喺講到古代兵法嘅時候，經常都會睇到一啲計謀可以不費一兵一卒就輕易令到其他國家滅亡。但呢啲故事並唔止古代兵書上出現，喺近代亦都曾經發生過。

隨住1947年邱吉爾發表「鐵幕演說」，「冷戰」正式拉開序幕，世界亦都因為咁而處於兩個對立嘅陣營當中，兩個意識形態唔同嘅陣營彼此抗衡，而呢個局面去到一個新嘅美國總統當選就出現轉變。喺1981年，加利福尼亞州州長列根贏得大選，成為新一任美國總統，呢位「演員總統」喺執政期間做咗一樣世人都估唔到佢會做到嘅事，間接令到蘇聯後來解體。

要知道其實當時蘇聯喺政治、軍事上都有住巨大嘅優勢，核武器數量甚至仲多過美國，所以要對付當時嘅蘇聯並唔係容易嘅事。之不過，其實蘇聯當時經濟情況陷入停滯，而列根睇準呢一點，喺上任幾日後就搵嚟時任中情局局長威廉·卡西商討局面。喺結合中情局研究之下，就發現當時蘇聯有唔少經濟問題都係憑住中東石油危機高價輸出石油積累外匯而解決，而且蘇聯國內由70年代開始工業以及經濟發展就停濟不前，所以絕對有機可乘。

於是，當時列根政府就主動出擊，展開一場針對蘇聯嘅經濟戰。當時美國等西方國家喺70年代都受盡石油危機嘅苦頭，喺完國國內經濟改革之後，生產力同產業都得以轉型，於是美國就喺1981年4月喺沙特建立中央指揮部，通過「保衛」油田以及出售武器，令到沙特石油產量高速躍升，令到世界油價由30美元一桶降到12美元，直接對蘇聯經濟體系造成重創，一時之間由石油積累外匯變成債台高築，不費一兵一卒擊敗蘇聯。

原圖嚟自網絡