薛仁貴三箭定天山？

尋日就同史友們介紹咗劉琨一曲胡笳吹散匈奴兵，今日就同史友們講一講薛仁貴三箭定天山嘅故事。

弓箭喺古代係相當重要嘅一門技能，「百步穿楊」「箭不虛發」甚至仲要係戰場之上令人可以存活落嚟嘅關鍵，薛仁貴正正就係弓箭手中嘅翹楚。喺大唐嘅西北邊境，原本就有一個由九大姓氏嘅聯盟「九姓鐵勒」部落同唐朝交好，但去到龍朔元年（661年）佢哋就聚集咗十萬大軍想喺天山造反。

當時薛仁貴就以副將身份出征，喺臨行之前唐高宗就為將士設宴壯行，當時佢就希望薜仁貴可以表演一下佢嘅箭技。唔試由是可，薜仁貴一試就唔單止百步穿楊，仲可以一箭射穿七層鎧甲，比春秋時期神射手養由基更加犀利。而當天山大戰一觸即發之時，九姓鐵勒先派出幾十名勇士向唐軍挑戰，薛仁貴大展神威，挽強弓令到敵方三人應弦而倒。