漢文帝霸陵考古出土 23組文物首展出

繼續同史友們介紹我國嘅一啲最新考古發現，早排漢文帝霸陵嘅考古發掘消息傳出之後，令到一眾考古迷相當期待。咁到底呢個入選全國十大考古新發現嘅陵墓會有咩重要文物出土呢？今次阿史就同大家講一講啦！

近排陝西省咸陽市漢景帝陽陵博物院就公布消息，原來省文物局近日主辦《治世之光——西漢帝陵考古成果暨致敬考古百年展》，當中就會向公眾首次展出23組文物。呢個展覽回顧咗西漢帝陵百年考古史，除咗有展出漢文帝陵園出土銅漏壺以及其他精品文物之外，仲會有新增嘅鎏金車馬器、銅印章、霸陵半塑陶俑等等，其中陶俑頸部仲係戴有刑具「鐵鉗」，亦都印證當時漢代帝陵修建之時係使用服刑人員作為重要勞動力。

喺文帝霸陵與景帝陽陵嘅文物共同展出之下，亦都係有助於彰顯西漢「文景之治」背景下嘅社會情況以及物質遺存與制度文化層面繼承與發展嘅遞變關係。