正所謂「葡萄美酒夜光杯,欲飲琵琶馬上催」!最近阿史受友人推薦,入咗幾支來自寧夏嘅紅酒。結果兩日前可以再聚會時就拎嚟試,飲之前阿友人就無啦啦吟咗呢兩句詩出嚟。

可能史友們對葡萄酒嘅認知,大概都係嚟自法國葡萄牙澳洲智利新西蘭等地,即係大家成日見到嘅紅酒同白酒。咁古代中國出現嘅葡萄酒又係點嘅呢?有關葡萄酒嘅記載,早响太史公嘅《史記》已有所載,根據《史記‧大宛列傳》所載:「宛左右以蒲桃為酒,富人藏酒至萬餘石,久者數十年不敗。」蒲桃就係當時由依家中亞地區傳至西域同中原嘅植物,亦即係歐亞品種嘅葡萄。而受西域文化傳入影響,葡萄酒亦成為唔少達官貴人推崇嘅奢侈品。呢種風氣一直下傳至魏晉南北朝,到咗唐代,更加係葡萄酒釀造史上嘅輝煌時期,唔單止產量大,而且釀酒技術不斷進步,品質亦愈嚟愈好,唔怪得咁多詩人都會寫下葡萄酒响啲詩辭之上。

之不過,古代中國葡萄酒同依家大家飲嘅就相當唔同,主要係同釀造方法有關。相傳,古代中國釀葡萄酒方法分別有蒸餾方式製作葡萄酒,以及以酒壇當中,但就無咗今時今日流行葡萄發酵釀酒過程,所以今時今日嘅紅酒就應該同中國古代個啲好唔同。响網上資料就話,新疆維吾爾族嘅慕薩萊思,就保留咗最原始嘅古代西域葡萄酒製作方法,唔知係真唔係呢?

原圖:明代《食物本草》