之前介紹西晉司徒王衍信口雌黃,某程度上係反映西晉上流社會有幾咁風氣敗壞,今日講呢段古,亦係後世人不時拎嚟作為西晉奢侈糜爛之風嘅引證。

話說西晉炫富誇富係一種社會時尚,西晉初期有兩個達官貴人,一位叫王愷,佢姐姐係文明皇后王元姬,絕對係朝中權貴。另一位叫石崇,係當時嘅權臣之一,《晉書》對石崇財富係有以下描述:「財產豐積,室宇宏麗。後房百數,皆曳紈繡,珥金翠。」

當時二人响生活上鬥富爭豪,行為都相當誇張,好似王愷用紫絲布築步障四十里,石崇則作錦步障五十里以敵之。有一次王愷以晉武帝所賜珊瑚樹當眾炫耀,石崇當場用鐵如意將珊瑚樹擊碎,然後拎自己所藏嘅六、七株珊瑚樹任王愷挑選。後後嚟佢哋愈玩愈大,仲以殺手相鬥。當時王愷舉行宴會,規定如果客人飲酒不盡,就下令會將勸酒嘅奴婢殺死。石崇知道後就如法倣效,有一次因賓客王敦堅持唔飲,佢就一連殺死三個美女。玩到咁大,只可能話魏晉南北朝時社會風氣真係唔係我哋現代人可以想像。

原圖嚟自網絡