古代點解立嫡長子 而唔立賢明？

喺中國嘅歷史上，唔少嘅皇朝興替、家族興亡都係同立邊一個位下任皇帝有關，但假如明明庶子比嫡長子優秀，點解古代就偏偏唔立賢明嘅一個呢？今次阿史就同大家講一講啦！

嫡長子繼承制其實最早就出現喺商周時期，呢個時期我哋嘅祖先就岩岩脫離部落制冇耐，但仍然保留住領地嘅意識，仍然係進行土地分封呢個舉動。之不過，同原始部落唔同，呢個時期佢哋意識到人口嘅重要性，所以並唔係進行原始嘅廝殺，反而嘗試去諗一啲制度解決問題。

分封制本身就存在一個問題，就係人口不斷增加嘅情況下，如果人人都可以得到土地，其實可以分到嘅土地亦都唔會多。於是，嫡長子繼承制就出現喇！所有土地都由嫡長子繼承，而其他兄弟就只會被派去其他地方鎮守。雖然現實的確係會出現庶子比嫡長子優秀嘅情況，但喺歷史上能夠更早確立繼承人亦都可以避免兄弟相爭。