細個個陣記得大台播過一套《大運河》，自此對內地條京杭大運河有一個古怪印象，就係見到呢個名就會諗起梁朝偉吳啟華等。講返正題，近日呢條千年運河再次全線通水，係近百年來第一次，真係夠晒歷史性。

讀過中史嘅史友都知，京杭大運河係一條北起北京、南至杭州嘅人工大運河，主體係以隋煬帝時開闢嘅幾條運河，但其實响歷朝歷代運河都有唔同程度嘅開拓，所以京杭大運河响中國歷史中一段相當長嘅時間﹐係古代中國南北運輸以至經濟嘅大動脈。不過到咗二十世紀後，京杭大運河停止漕運，河段又淤塞不通，失去咗過去嘅重要性。近年，當局開始對唔同河段進行整治，最終呢條千年運河得以再次全線通水。

原圖：xinhua