乾隆放走一個小朋友 47年後間接導致清朝滅亡?

唔殘害小朋友，無論對盜賊定還是帝王都係一個共識，之不過唔知史友們有冇諗過，一個帝王會因為放走咗一個小朋友後來間接令到自己嘅王朝滅亡呢？今次阿史就同大家講一講啦！

喺乾隆年間，其實正值大清最興盛嘅時候，喺呢個時期中西交流亦都有唔少，英國喬治三世國王甚至仲派出使團去到中國洽談兩國之間貿易磋商事宜。喺1792年，英國喬治三世國王派遣以喬治·馬戛爾尼勳爵為首訪華船隊前往中國，呢個使團入面仲有一個叫做喬治·倫納德·斯當東嘅小朋友，佢嘅任務就係為特使拎住斗篷同埋奉上金盒。當時呢位12歲嘅小朋友係可以親眼見到乾隆,甚至仲得到乾隆送個荷包畀佢，但乾隆本人都唔會估到，呢位小朋友後來會成為清朝滅亡嘅關鍵人物之一。

返到英國之後，呢位小朋友繼續學習中文、對中國亦都有巨大嘅興趣。喺1816年，英國就再次派出大使團嚟到中國商量談判通商之事，呢位當年去過中國嘅斯當東亦都成為使團副手。之不過，呢次出訪並唔順利，嘉慶皇帝並冇見到佢哋，呢個舉動亦都令到斯當東認為「用和平的手段與中國建立外交關係是不可能的」。正因為有咗呢個結論，引發後來種種悲劇。