保存至今古代狀元試卷 到底有幾犀利?

明清年間傳世嘅書畫可能史友們都睇唔少，呢類文學創作古人都會有充足嘅時間準備寫作，但如果係要喺科舉考試當中取得狀元嘅成績，咁相應嘅試卷又會係點呢？今次阿史就同大家介紹一下呢份極為罕有、由古代保存至今嘅狀元試卷啦！

科舉制度由隋朝創立，一直延續去到清朝光緒年間，呢場歷經1300幾年嘅制度出過600幾位狀元。呢啲狀元嘅試卷理應被視為珍品，但無奈都因為朝代興替而流失，而今次阿史要介紹嘅呢份試卷，其實就係絕無僅有，現今就收藏喺山東青州博物館。

呢份試卷嘅主人就係明朝萬曆年間大名鼎鼎狀元趙秉忠，佢官至禮部尚書，自小熟讀四書五經嘅佢，以25歲之齡高中狀元，當時佢份試卷就係喺自己官場失意之時一同帶回家鄉，並且被家族視為形寶先得以保存。喺試卷之上，仍然可以睇到由萬曆皇帝親筆寫下「第一甲第一等」，當中試卷嘅內容仲要係關於「問帝王之政和帝王之心」，全文2460個字以工整小楷字體書寫而成，而且當中仲要一隻錯字都冇，真係相當難得。