之前阿史介紹咗京杭大運河再次全線通水，今次就講下明清時期一個同京杭大運河好有關係嘅組織- 漕幫。

响介紹漕幫之前，就要講講京杭大運河响明清時代嘅作用。明清兩代依靠呢條大運河實行南糧北調，以南方豐富物資供應京師同北方邊防，而利用水道轉運糧食嘅方式就叫做漕運。响以往，漕運係好有組織，以明制為例，凡漕運船隊設總運一名，下設運官二十名，各押運糧船二十隻，每船設幫長一名，管領船戶十九名。五船取一互結，二十船取一總結。按時開幫，首尾相銜，以防事故。到咗清代，就改為由漕省分衛所將所屬漕船，編組為若干幫。以幫為單位，開兌、起運、交倉。每幫設領運千總二人，分年輪番領運；武舉一人，隨幫效力。而呢度提及嘅幫，就被稱為漕幫。有趣嘅係，呢班負責漕運嘅人，做嘅又算係國家級任務，但身份又有啲係官有啲又唔係，亦由於利益太大，所以唔同地域漕口都有自己一套管束下屬嘅法規，避免一啲不肖分子及其他唔係一伙嘅人影響漕運進行。慢慢呢種有工會特徵嘅漕幫就變到好似唔同嘅幫派組織咁，唔同地方就有唔同派系。後嚟有啲派系加入咗宗教元素在內，例如會拜祖師爺咁，就慢慢同民間江湖組織同質化，因而有人認為漕幫係中國黑幫嘅前身。

原圖嚟自網絡