繼續同史友們介紹我國最新嘅考古發現，今次要介紹嘅繼續係入圍2021年全國十大考古新發現嘅雞叫城遺址。

雞叫城遺址嘅考古發掘工作其實喺上世紀90年代已經展開，中途曾經暫停，但去到2019年又再次重啟並且連續掘挖三年。咁到底喺呢個遺址當中有咩發現呢？

要知道其實雞叫城遺址最早遺存係喺彭頭山文化時期，去到大溪文化時期先再次有人定居並且發展到油子嶺文化時期嘅環壕聚落。去到後來嘅屈家嶺文化時期，先民就將環壕填平開挖城壕堆成城牆，令到呢片原本係湖沼逐漸成陸，變成有開溝排澇，圍堤造田嘅地區。

而喺雞叫城遺址當中，就有一個標示為F63嘅大型建築遺址保存十分完好，當中就有一座五開間七室、面積420平方米嘅豪宅被發現，經考古發掘之下仲搵到整體結構係地台式加幹欄式木構建築；而附近嘅城牆更加發現有經過3次城牆建造。至於下一步嘅考古發掘工作，重點就將會尋找發掘水稻田，希望可以解開從玉蟾岩到彭頭山，從城頭山到雞叫城嘅稻作農業之謎。

原圖嚟自網絡