最近睇返《三國志》,睇返劉備軍打完赤壁之戰後企穩响荊州陣腳,之後就派兵入蜀,霸埋益州做地盤。後世三國嘅故事好多時都係以劉備嘅角度去睇,咁當時情況係點呢?

劉備入蜀之前,益州牧為劉璋。劉璋係劉焉個仔,劉焉死後佢子承父業,成為一方之霸。不過,劉璋為人懦弱,面對四周強敵佢好多時都會做錯決定。講返最開頭個話題,劉備之所以會派兵入蜀,就係因為劉璋收到消息話曹操會進軍巴蜀,所以佢就以劉備做引援。點知劉備就藉機攻擊劉璋軍,正宗係引狼入室。

不過講時講,劉璋的確算係一個好人。當劉備大軍攻到去成都個陣,成都城內其實係可以死守一段時間,但劉璋就心有歉疚,話「父子在州二十餘年,無恩德以加百姓。百姓攻戰三年,肌膏草野者,以璋故也,何心能安!」因為佢心痛同埋心軟,所以就將自己成個地盤俾咗劉備。

原圖嚟自網絡