以往阿史都同史友們介紹過關羽嘅生平事跡,不過唔知史友們有冇諗到一點,就係明明關羽就算點好打都係一個「人」,點解後世佢又會成為一個「神」、一種信仰呢?今次阿史就同大家講一講啦!

關羽,字雲長,係東漢末年名將,最初係追隨劉備,後來喺赤壁之戰後就被封為襄陽太守。之不過喺劉備佔領益州之時,關羽留守荊州最終仲敗走麥城,被殺於臨沮,蜀漢後主劉禪追諡其為「壯繆侯」。睇到嚟呢度,相信唔少史友都知佢點睇都係一個活生生嘅人,又點解會被封為神呢?

原來一切都係由「壯繆侯」呢個封號開始,當時嘅人民都覺得「壯繆侯」係屬於一個貶諡嘅封號,並唔足以形容關羽本身嘅忠勇氣概,義薄雲天。唔單止民間開始稱佢為「關公」,甚至喺帝王之間都多次因為佢嘅「忠義」而多次加封關羽,由宋徽宗崇甯元年嘅忠惠公去到清德宗年間更是被奉為「忠義神武靈佑仁勇威顯護國保民精誠綏靖翊贊宣德關聖大帝」;而喺道教關羽就係武財神;天臺宗就視佢為「伽藍護法神」。

就係咁,關羽就經歷咗「侯而王,王而帝,帝而聖,聖而天」嘅過程。

原圖嚟自網絡