對於香港火車迷而言,今日都算係一個大日子,因為九鐵「十二卡」(即十二節車廂)列車開埋今日就正式退役完成歷史任務,之後東鐵線就以「九卡」(即九節車廂)列車運行,十日後仲過埋海開到去金鐘添,所以今個五月真係好有紀念性。

東鐵線嘅「十二卡」列車其實唔少人都坐過,而且佢本身仲有一樣好特別嘅嘢,就係佢嘅「前世」。車都有「前世」咁玄?其實東鐵「十二卡」列車,最初係1983年引入香港嘅都城嘉慕列車,呢款列車係九鐵實現電氣化後响九廣鐵路香港段行走,亦即係大家圖中見到嘅「黃頭列車」。到咗九十年代中期,因為啲車都用咗一段時間,於是就進行翻新,响1997年後再次投入服務,就成為咗火車迷口中嘅「烏蠅頭」。

由於東鐵線要過海關係,港島新嘅車站月台空間所限,又要採用新信號系統,所以就响東鐵過海線通車線「換車」,最終無論係「十二卡烏蠅頭」,抑或「黃頭列車」,都成為香港人嘅回憶。

原圖:wenweipo