記得細個讀書個陣，班中有一個同學朝朝都好早起身讀書預習，中史老師知道咗之後就話佢十足聞雞起舞嘅故事咁。
聞雞起舞呢句成語係指比喻及時奮起行動，係勤力同有堅忍力嘅表現，故事係嚟自東晉名將祖逖嘅少年事蹟。據《晉書．祖逖傳》，話說祖逖年少時好友劉琨一齊生活，有一日天未光一聽到雞鳴，就起身拔劍練武，刻苦鍛練，期望有一日可以報效國家，對抗外敵。當然！佢嘅毅力亦令佢成為東晉一位重要武將。
當時西晉新亡，司馬睿响黃河以南之地重整旗鼓，重用祖逖。祖逖招撫黃河流域一帶各自為政嘅塢壁，又屢次攻破石勒，令黃河以南盡入晉土。可惜，隨著祖逖聲望日漸上升，晉元帝司馬睿開始對佢有所顧忌，於是任命戴淵為征西將軍，都督北方六州軍事，以節制祖逖。一心想北伐嘅祖逖最終憂憤成疾，死於軍中。
响中國歷史上，都有唔少出色將領因為太勁而被打壓，祖逖就係其中一個。
原圖：《聞雞起舞圖》