繼續同史友們探討一啲有趣嘅歷史謎題,「十全老人」乾隆身處喺清朝最強盛嘅時期,但隨之而嚟嘅就係經濟社會高速發展,封建體制亦都面對前所未有嘅壓力。為咗可能令到呢個封建王朝得以延續,選擇邊一個作為繼承人其實係一個相當重大嘅決定。
乾隆在位六十年,共有十七個仔,能力出眾嘅亦都有唔少,之不過到底點解佢會選擇一個佢自己都認為係平庸嘅仔作為接班人呢?其實呢個決定真係逼於無奈!喺最初嘅時候,佢其實係選擇咗永璉為皇太子,但點知冇幾耐永璉就不幸去世;到轉立嫡出嘅永琮立為儲君之後,永琮又不幸夭折,乾隆傷心至極自此一直都唔提立儲之事。
而去到佢年過六十之後,先至重新考慮皇位繼承人嘅問題,去到呢個時候,其實佢嘅十七個仔就只係得返七個,當中皇四子、皇六子早已被過繼,皇十一子就係廢后那拉氏所生,所以實際上就只係得返四個皇子。再喺呢四個皇子當中選擇,皇八子沉湎酒色、皇十一子視財如命、皇十七子終日遊山玩水,最後就只有天資平庸嘅十五子永琰會勤能補拙,無奈之下就只係得佢可以選擇。
喺乾隆六十年,乾隆帝立永琰為皇太子,並宣佈第二年歸政於永琰,但自此之後其實乾隆帝一直都喺養心殿訓政,宮中繼續用乾隆年號,權力仍然喺乾隆手中。
原圖嚟自網絡