尋日就同史友們介紹到點解曾國藩湘軍同清朝同時期嘅其他清軍咁唔同，除咗裝備精良、紀律嚴明之外，到底仲有咩因素令到呢支幾萬人嘅軍隊足以戰勝幾十萬人嘅太平軍呢？今次阿史就同大家講一講啦！
其實要戰勝龐大數目嘅敵軍，戰術絕對係相當重要嘅一環，曾國藩嘅湘軍就巧妙地用到幾種戰術。其一，湘軍每到一個戰場，都必定會嚴密佈防、深溝高壘，一日營壘未成都唔會休息。呢個方法唔單止可以令到部隊有休息嘅空間，仲可以配以嚴密嘅防守系統，阻止敵人快速入侵。而呢種紮營壘、掘長壕嘅方式其實唔止係用於防守，亦係進攻嘅一種方法。喺安慶戰役當中，湘軍就係以營壘圍困太平軍，做到斷其糧汲之道，十日之內令到兩萬幾太平軍全軍覆沒。
而喺曾國藩占安慶，李鴻章破蘇杭，左宗棠收江西之後，當時太平天國所在嘅南京亦都被圍困，湘軍依據以上嘅戰略以及火炮優勢，令到南京城被圍困超過一年，長達13年嘅太平天國運動就咁落下歷史嘅帷幕。
原圖嚟自網絡